5 Oktober

Deur Andró Griessel

UA klop weer buitelandse belegging oor afgelope 5 jaar

‘n Suid-Afrikaanse rugbyondersteuner kan maar erg emosioneel wees – en soms is dit ook hoe ons belê. Kyk nou maar na Manie Libbok, wat verlede jaar in die Wêreldbeker-rugbytoernooi en weer onlangs in die Rugbykampioenskap in die gemoed van die gemiddelde Bok-ondersteuner van “hero” na “zero” en terug geswaai het.

Die feit is dat Libbok fundamenteel ’n talentvolle rugbyspeler is wat soms ’n af-tyd met sy skopwerk pale toe beleef. Net soos almal ná sy uitstekende vertoning in die toets teen die Poemas in Mbombela weer baie positief oor Libbok is, het die sentiment jeens Suid-Afrikaanse beleggings sedert Mei aansienlik verbeter – sonder dat daar fundamenteel veel aan die bates self verander het.

Lesers wat gereeld my en my kollegas se rubrieke lees, sal weet ten opsigte van beleggings dink ons dit is belangriker om te verstaan of jy fundamenteel met ’n goeie “speler”/belegging te doen het en hom dan (soos Rassie) ’n kans te gee om dit te bewys.

Sommige spelers (soos Eben Etzebeth) het eenvoudig iets wat lyk soos ’n onregverdige voorsprong bo sy mededingers. Ons het al verskeie artikels geskryf waarin ons aanvoer dat laekoste-annuïteite ’n onregverdige voorsprong bo ander beleggingstipes het, vernaam vir beleggers in ’n hoë marginale belastingkerf.

Vir hierdie beleggers is annuïteite as ’t ware soos ’n losskakel wat die bal kan versprei soos Libbok, onder druk kan skop soos Handré Pollard en boonop die krag van ’n Etzebeth het.

In April 2019 het die skrywer die “omstrede” stelling gemaak dat ’n belegging in die mediaan gebalanseerde fonds in die multibate-hoë-aandeel-sektor met ’n prestasie van 9,81% per jaar in die vyf jaar tot 31 Maart 2019 beter sou kon vaar as die mediaan-buitelandse aandelefonds se prestasie van 14,27% indien die belegger eenvoudig die belasting wat hy teruggekry het, hierin sou herbelê.

Wat van die afgelope vyf jaar?

Dit sou tog seer sekerlik nie die geval gewees het die afgelope vyf jaar nie? Niks beantwoord so ’n vraag beter as die syfers nie. Sien die grafika hierby vir ’n werklike voorbeeld.

Vyf jaar gelede, op 30 September 2019, was die saldo op hierdie kliënt se uittreeannuïteit (UA) R273 926,47. Die spesifieke kliënt is ’n hoë verdiener en betaal dus belasting teen die maksimum marginale koers (tans 45%). Om daardie rede het hy maandeliks R29 000 tot sy UA bygedra. Op 30 September vanjaar was die UA se saldo R3 005 893,97. Dit verteenwoordig ’n netto gemiddelde opbrengs oor die afgelope vyf jaar van 13,6% per jaar.

Uit bogenoemde is die volgende syfers insiggewend.

• Selfs al het jy 100%-blootstelling aan die MSCI-wêreldindeks gehad, sou jy, met aansienlik groter wisselvalligheid, oor die afgelope drie of vyf jaar beswaarlik ’n UA-belegging (onderhewig aan regulasie 28 van die Wet op Pensioenfondse) kon klop. Oor een jaar sou jy sowat 5% swakker gevaar het met ’n suiwer buitelandse aandelebelegging.
• Om ’n UA-belegging (wat aan omsigtigheidsbeginsels moet voldoen) te vergelyk met ’n suiwer buitelandse aandelebelegging is natuurlik ook nie om appels met appels te vergelyk nie. Indien jy dit dus moes vergelyk met ’n buitelandse belegging met soortgelyke risiko eienskappe (met ander woorde wat kontant en/of buitelandse effekte ingesluit het) sou jy amper 7% per jaar swakker gevaar het met jou buitelandse belegging, oftewel vandag ’n saldo van slegs R2,4 miljoen gehad het.
• In Amerikaanse dollar: Dollar-inflasie oor die afgelope vyf jaar was gelyk aan 3,69% per jaar, terwyl die dollar-prestasie gelyk was aan 11,23% per jaar. Oor die laaste een-jaar-tydperk was die opbrengs gelykstaande met 36,53% teenoor inflasie van 2,06%. Gemiddelde inflasie oor die afgelope vyf jaar in Suid-Afrika was gelykstaande met 5,28% per jaar wat beteken die kliënt se belegging het inflasie met meer as 8 persentasiepunte per jaar geklop.
• Wat nie in die bygaande grafiek getoon word nie, is wat die belegger bykomend tot hierdie belegging sou kon hê indien hy die maandelikse besparing in belasting van ongeveer R11 600 (gegrond op ’n veronderstelde belastingkoers van 40%) herbelê het. Indien hy slegs ’n 10%-opbrengs op hierdie geld sou kry, sou dit sy totale beleggingswaarde met ’n verdere R900 000 (ongeveer 33%) opstoot.

Stof tot nadenke

Een baie goeie jaar of een baie swak jaar in terme van opbrengs verander ook die langer termynopbrengs. Dit is waarom dit soms voel of jy op ’n ompad ry, maar dan kom jy skielik by jou bestemming aan, of jy ry dalk baie lekker, en stort dan skielik oor ’n afgrond. Dit is uiters belangrik om te verstaan watter risiko jy neem op jou beleggingspad. Beleggings wat riskant voel, is dikwels nié (omdat daar ’n groot veiligheidsmarge in die prys verskuil is), terwyl beleggings wat veilig voel, dikwels nié is nie om die teenoorgestelde rede.

Daar is ’n paar vrugte wat laag hang in die beleggings wêreld as gevolg van die strukturele voordele wat dit bied. Indien jy dit reg benader, en indien jy in die boonste belastingkerwe is, is ’n UA een van hierdie. Wanneer die belastingkrediete herbelê word, is dit feitlik onmoontlik om dit op langtermyn te klop.

Daar is ’n kommentator wat in Augustus 2019 die volgende op sosialemediaplatforms gesê het: “Can you sue your financial advisor for NOT shifting your money offshore? Believe it or not, I still hear of financial advisors who don’t believe in offshore! It’s not a belief, it’s survival… .”

Nou ja, ek verwag geen verskoning uit dié geledere aan adviseurs wat ’n meer pragmatiese en fundamentele (eerder as emosionele) proses gevolg het nie. Maar my advies aan lesers is om nie soos sommige Suid-Afrikaanse rugbyondersteuners te wees wat permanent in ’n staat van of euforie of depressie verkeer nie, en om eerder ’n kalm en rustige benadering te volg met feite, eerder as retoriek, as die grondslag vir besluitneming.

Andró Griessel is ’n gesertifiseerde finansiële beplanner vanWoodland Wealth. Kontak hom by info@woodlandwealth.co.za

Alhoewel alle moontlike sorg geneem is met die opstel van hierdie dokument kan die feitelike korrektheid van die inligting hierin vervat, nie gewaarborg word nie. Hierdie dokument behels nie advies nie en enigiemand wat enige finansiële optrede beoog op grond van hierdie dokument, word sterk aangeraai om eers met sy/haar persoonlike finansiële adviseur oorleg te pleeg. Woodland Wealth is ‘n gemagtigde finansiële diensverskaffer met FSP no. 5966.